“Qarşıdakı Qarabağ danışıqlarında bəzi sürprizlərin olması gözləniləndir, Ermənistan bu sürprizlərə hazır olmalıdır”.

Publika.az xəbər verir ki, bu barədə 1992-95-ci illərdə Ermənistan prezidentinin xüsusi tapşırıqlar üzrə səfiri olmuş David Şaxnazaryan deyib.

Şaxnazaryan qeyd edib ki, Azərbaycan əhəmiyyətli diplomatik fəallıq göstərir: “Xarici işlər naziri Məmmədyarov Vaşinqton, Berlin, Brüssel, Paris kimi siyasi mərkəzlərə ardarda səfərlər edir. Bununla yanaşı, etibarlı mənbələrdən əldə etdiyim məlumata görə, Prezident İlham Əliyevin tezliklə Vaşinqtona səfəri gözlənilir və bu səfər çərçivəsində Qarabağla bağlı mühüm danışıqlar ola bilər”.

Erməni diplomat hesab edir ki, Bakı münaqişənin həlli üçün tələsir və bu istiqamətdə real diplomatik addımlar atır.

Qeyd edək ki, ABŞ prezidenti Donald Trampın son günlər Azərbaycan prezidenti İlham Əliyevə üç məktub ünvanlaması, bu məktubların birində “qarşıdakı aylarda Qarabağ münaqişəsinin həlli üçün yeni imkanlar yaranacaq” ifadəsini xüsusilə işlətməsi Ermənistanda narahatlığa səbəb olub. Çünki Serj Sarkisyan dövründə Ermənistanın əsas dayaq nöqtəsi Rusiya hesab olunurdu, lakin Paşinyan dövründə Moskva İrəvanın “göz yaşlarına inanmır”. Bununla yanaşı, İrəvanın söykənmək istədiyi Vaşinqton Bakı istiqamətində körpünü tikir. Dəqiq informasiya olmasa da, bu proseslər fonunda Azərbaycan prezidentinin Vaşinqtona səfər edəcəyi gözləniləndir. Və bu, Trampın da dediyi kimi, Qarabağ münaqişəsinin həllində mühüm ola bilər.