“Milli Təhlükəsizlik Xidmətinin (SNB) direktoru Artur Vanetsyanın istefası ilə bağlı bəyanatı Ermənistan Silahlı Qüvvələrinə qarşı hörmətsizlikdir”.

“Qafqazinfo”nun “Sputnik Ermənistan”a istinadən verdiyi xəbərə görə, bu barədə hazırda ABŞ-ın Los-Anceles şəhərində səfərdə olan Baş Nazir Nikol Paşinyan mətbuat konfransında bildirib.

“Cənab Vanetsyan verdiyi açıqlamada bir zabitin şərəfindən danışıb. Lakin o, SNB-nin direktoru olaraq, əslində öz Ali Baş Komandanına qarşı bəyanat verib. Bir məmurun şərəfinə bundan artıq hörmətsiz münasibət ola bilməz.

Vanetsyananın istefa ərizəsinin ölkə başçısının müvafiq fərmanından öncə Milli Təhlükəsizlik Xidmətinin rəsmi saytında yerləşdirilməsinə gəlincə, bəli, zabit bunu da edib. Siz bilirsiniz ki, bu nə deməkdir? Bu, rütbəni zibil qutusuna atmaq deməkdir”, - deyə Paşinyan vurğulayıb.

Xatırladaq ki, bir nüçə gün öncə Ermənistan Milli Təhlükəsizlik Xidmətinin rəhbəri Artur Vanetsyandan sonra Ermənistan polisinin rəisi Valeriy Osipyan da istefa verib.

Erməni KİV-i yaxın günlərdə ölkədə kütləvi istefaların baş verəcəyini yazır.