Yüz minlərlə insan Türkiyəyə doğru gedir – Ordu mühasirəyə düşdü, Rusiya və İran…
Suriyada yüz minlərlə dinc sakinin sığındığı İdlib-Hələb xəttində insident şiddətlənib.
Son 48 saatda qarşıdurmanın mərkəzi Hələbin qərbi olub.
Buradakı atışmalarda PKK/YPG terror təşkilatı da Bəşər Əsəd rejimi ünsürlərinə dəstək verib. Əvvəlcə Türkiyə Silahlı Qüvvələrinin müşahidə məntəqələrinin yerləşdiyi Şeyx Aqilə hücum edən PKK/PYD müxalifləri əzib keçə bilməyincə rejim və İrana bağlı milislərlə əməkdaşlığa gedib. Təşkilat nəzarəti altındakı bölgədən Nəbul Zəhrada yerləşən rejim və İran milislərinə dəhliz açaraq Başhimraya getmələrini təmin edib.
Buradan hücum edən qüvvələr Şeyx Aqili alaraq müxaliflərin nəzarətindəki böyük bir bölgəni mühasirədə saxlayır. Bir neçə kənd və qəsəbə ələ keçirilib. Hücumlarda PKK/PYD-ya rejim və İranın topçu dəstəyi verib.
Türk məntəqələri mühasirədə
Atışmaların hədəfi Şeyx Aqil və Cəbəl Bərəkətdəki türk ordusunun müşahidə məntəqələri olub. Nəticələrlə bağlı açıqlama verilməyib. Müxaliflərin əlində sadəcə Ətarib və Darət İzzə qalıb. Anədandakı türk müşhidə məntəqəsi tamamilə mühasirədədir. Rejimin ələ keçirdiyi 3 qəsəbədən 100 mindən çox insan Türkiyə sərhədinə köçmək məcburiyyətində qalıb.
İran, Rusiya və Əsədlə razılıq
Qərbi Hələbə hücumdan əvvəl terror təşkilatı Əsəd rejimi, Rusiya və İran ilə bazarlıq edib. Rusiya Prezidenti Vladimir Putinin xüsusi nümayəndəsi Mixail Boqdanov tərəfindən başladılan müzakirələr Hmeymim Rusiya Hərbi Bazasında baş tutub. Görüşlərə Əsəd adına kəşfiyyat şefi Əli Məmlük, PKK/YPG adına İlham Amed və Əldər Xəlil qatılıb. Görüşlərdə /PKK İdlib və Hələbdə rejimə dəstək vermək qarşılığında Afrin məsələsində yardım istəyib. Rejim, İran ve Rusiyanın bu təklifə nə cavab verdiyi maraq dairəsindədir.
Türkiyə tədbirləri davam etdirir
Türkiyə Silahlı Qüvvələri (TSQ) İdlibdəki müşahidə məntəqələrinə tank, zirehli daşıyıcılar, top və ağır sursatlar yığıb. Türkiyənin fərqli birliklərindən göndərilən 150 avtomobillik konvoy Hatayın Reyhanlı rayonunda dayanıb. Konvoy təhlükəsizlik tədbirləri altında İdlibdəki müşahidə məntəqələrinə göndərilmək üzrə yola çıxıb.
Rejimin hücumları nəticəsində Türkiyə ilə sərhədə köç edən qaçqınların sayı 2 milyona yaxınlaşır. /Publika.az/
